السلام عليكم ورحمة الله وبركاتة
ثابت إن الشيطان بيبكى .. بكى يوم عرفه! .. وبييأس .. يأس من سيدنا عمر .. ويأس أن يعبد غير الله فى جزيرة العرب! .. صح؟ .. بيتألم! وبيحس! وبيغير! و و بينضرب! .. والنهارده أنا جاى بفكره عايزكم تساعدونى فيها ..لو نفذناها صح والله هتسمع صراخه وعويله! هتشوف دمه مخضب على الصفحه ديه لدرجة إنك ممكن تقوم تمسح اللابتوب من الدماء النجسه!ا
قبل ما أقولك الفكره .. هو إنت فعلا لو إتأكدت إن اللى هأقوله لك ده بيوصل للشيطان وبيغيظه! وبيفرسه! وبيألمه! وبيقطعه! وبيدمى منه! .. تفتكر ممكن نرحمه؟ .. والله لو كان الشيطان رجلا لصلبته! .. طيب جهز نفسك لأنه مصلوب بالفعل! أنا مش بهزر . .أهوه قدامك .. إبدأ إرمى الجمرات!ا
الفكره كلها بتتلخص فى الآتى .. إنت حياتك كلها عباره عن معركه كبيره مع الشيطان والنفس والشهوات .. والمعركه ديه فيها جولات .. مره بتكسب .. ومرات بتخسر .. فى إحدى جولاتى مع الشيطان خرجت منها متدغدغ بمعنى الكلمه! متدشدش! .. حسيت إنى إتهزمت شر هزيمه! .. وقررت الإنتقام! .. لكن .. لكن إيه فايده الإنتقام لما تكسب مره ولا مرتين ولا حتى تلاته وبعدين ترجع تتهزم تانى! . زانا عايز ضربه قاضيه! .. انا عايز أحسم المعركه! .. انا عايز أقتله المره ديه مش أهزمه! .. عايز أيأسه منى زى سيدنا عمر! .. فضلت أدور ادور .. لقيت إن أفضل طريقه هى إنى أضربه فى مقتل! .. طيب إزاى ألاقى مقتل؟
بحثت فى كل السنه! . .ادور على حد سأل النبى عليه الصلاة والسلام السؤال ده .. لقيت سؤال قريب منه .. واحد راح للنبى صلى الله عليه وسلم وهو مهزوم وقاله يارسول الله! لقد ثقلت على شرائع الإسلام! فإعينى على شىء أتشبث به! .. قلت الله أكبر! هو ده! .. فرد عليه النبى عليه الصلاة والسلام ..قاله لا يزال لسانك رطبا بذكر الله! .. قلت فى نفسى . .أيوه بس إزاى؟! .. هفضل طول النهار أسبح مثلا؟! .. مش هأقدر .. هسرح! .. هنسى! .. هتشغل! .. هو ده الحل فعلا .. لكن إزاى؟ .. لغاية ما لاقيت قصه تانيه فى التاريخ
قصه لعالم وصى تلميذه بإنه يكثر من قول (الله راقبى الله ناظرى الله مطلع على) .. قلت ماهى هى! .. طب ماهو أنا بدل ما أقول ديه ما أسبح على طول وخلاص؟! .. مش لاعب! .. انا عايز حل تانى! .. لغاية ما لقيتها بجد المره ديه! .. لقيت حديث بيقول (أيها الناس توبوا إلى الله وإستغفروه فإنى أستغفر الله فى اليوم مائة مره)! .. قلت بسسسسسسسس! لقيتها! .. أنا لازم أجرب الطريقه الديجيتال ديه! .. أنا هأوقف 100 همه لذنب كل يوم! .. كل ما أنوى ذنب هأوقفه .. وهأفضل أعد كل يوم 100 مره زى الحصاله كده! .. بقيت بتابع الرقم ده كل يوم عالموبايل! ..لقيت إنشغالى بتجميع الرقم ده كل يوم قلب حياتى كلها رأسا على عقب! .. أو قل عدلها! .. حسيت إنى بألسع الشيطان كل يوم 100 ضربه فى مقتل! .. حسيت إنى أقوى! .. وقررت إنى أحكيلكم على الحدوته ديه علشان تضربوا معايا! .. يالا . .لو عايز .. سجل الرقم ده عندك على الموبايل وسميه (توبه) .. ده الإسم .. أما الرقم فحط (صفر) .. وكل يوم إبدأ العد .. كل ما تتوب مره زود العدد ده واحد .. وكل يوم صفره تانى .. وهكذا .. ويالا نضرب! .. محدش يرحمه! .. إرموا الجمرات!ا
منقوووووووووووووووووووووووووووول
موضوع: ادخل إضرب معانا! الشيطان جوه محبوس فى الصفحه ديه! 
الأحد أكتوبر 10, 2010 11:46 pm
